新車激試

負責任的中產　 Lexus ES300h Ultimate

香港人好有錢？筆者認為只係一小撮人有錢，窮人多、中產亦都多。窮人有幾慘都唔需要多介紹，但唔好以為身光頸靚嘅中產就唔慘，佢哋有另一種慘，慘在高不成，低不就，買部車都要諗過度過，下下都要睇吓買車會唔會令自己形象受損，啱唔啱預算啦、會唔會威過老闆啦、屋企人坐得舒服嗎？種種都困擾中產。 Lexus最近推出 ES300h，筆者試過車後覺得佢根本係為中產而設，仲要加埋夠環保，要成為一個有承擔嘅中產， ES300h走唔甩。

以 Lexus廠方同本港代理近年嘅做法，差不多所有新車都會有 Hybrid版本，而且仲係同普通版同一時間引入。今次嘅 Lexus ES300h其實同 ES250都係同一時間到，但代理只安排 ES250先出場。要知道新款 ES有幾正，並唔係睇 ES250，呢部 ES300h先係晒冷作。

Ultimate版更後生

每一個中產人士都想自己形象年輕啲、有活力一啲，明明有能力買部 86威吓，但又怕太過𡃁仔；明明有錢買部歐洲房車，又怕人以為自己發咗達。 Lexus嘅車其實好啱呢班低調中產， IS又細又 young， GS又買唔起， ES就剛好填咗空缺，而且 ES300h已配上 Ultimate車身包圍，外表比遠古年代 ES有型之外，又有豪華味，着西裝或運動衫都啱揸！筆者認為新一代 ES對比 IS及 GS是比較含蓄了，有 LS影子，而實際上 ES300h車身長達 4,900mm，比 GS長 50mm，係目前本港有售第二大車身嘅 Lexus。
有不少人以為 ES300h採用 Toyota Camry底盤，其實兩車早已分家， ES300h採用美洲版 Avalon底盤，車廂空間及駕駛表現都同 Camry唔同。

(繼續閱讀...)